開工一星期

原來人係可以變得好快。


三年前，我喺G投行開工當日，簡直可以用＂開心到飛起＂來形容。梗係啦，幾經辛苦，入到心儀已久嘅bank。仲記得之前嗰晚，我半夜去瞓，但係喺張床度典來典去，攪到朝早４點幾先瞓得著。第一日返工，未到８點半就碌到番公司，發覺所有嘢都係完美，就算俾人staff都零舍開心興奮。好難想像啊！

啱啱呢個禮拜一，喺大半年悠長假期之後，卒之復工。星期日嗰晚心情異常平静，仲瞓得好好添。９點準時去到S投行，講真真係冇乜感覺，因為未有expectation。到禮拜三，我嘅背脊已經抵受唔住坐office的生涯，好似風濕咁「寃」住痛，攪到我要返屋企坐番喺我嗰張超舒服又好玩嘅recliner度做埋啲嘢。

總算無驚無險，又到禮拜五，好彩已經做哂嘢，weekend唔洗返工…好嘢，可以去玩、打波、見朋友、去RDA、做生意–同埋睇何韻詩演唱會。Yeah！